dossiers

Ministri i drejtësisë, Christoph Blocher (Foto: snc)

"Neni i anti-racizmit më shkakton dhimbje stomaku"

Deklaratat e Blocher-it në Turqi provokojnë Zvicrën

• Ministri i drejtësisë, Christoph Blocher, gjatë vizitës së tij në Turqi ka kritikuar normën penale kundër racizmit. Ky nen i shkakton atij dhimbje stomaku.

• Prononcimet në Turqi të ministrit të drejtësisë, Christoph Blocher, lidhur me normën penale antiraciste, kanë hasur në kritika në Zvicër. Për FDP, CVP dhe për të Blertit, ndryshimi i këtij ligji as që vjen në pyetje.

snc-shqip: Bislim Elshani

ANKARA/ BERNË. (05.10.06) Kritikën kundër normës penale anti-raciste ministri Blocher e ushtroi në një simpozium me rastin e 80-vjetorit të së drejtës civile turke në Ankara. Në Zvicër prononcimet e tij u kritikuan pjesërisht shumë vrazhdë.

"Ky nen më shkakton dhimbje stomaku", tha ministri i drejtësisë, Christoph Blocher, të mërkurën para mediave në Ankara. Ai po kritikonte kështu nenin 261 të kodit penal, të ashtuquajturën normë penale kundër racizmit.

Blocher-i shprehu keqardhjen se në Zvicër në bazë të këtij neni janë në zhvillim e sipër procese penale kundër ca turqëve prominentë. Kështu psh. në njërën anë kjo po ndodh me historianin turk, Yusuf Halacoglu, i cili vlen si një prijës ideologjik për qeverinë turke. Në anën tjetër, jurisprudenca po heton edhe kundër shefit të Partisë nacionaliste turke të punës, Dogu Perinçek.

Që të dy mohojnë hapur genocidin e ushtruar kundër armenëve nga viti 1915 deri më 1917 nga perandoria e atëhershme osmane.

Verifikimi i ndryshimit të normës penale

Ky nen ligjor hyri në fuqi me 1994, me qëllim që të pengonte mohimin e holokaustit, genocidit ndaj hebrenjve në Luftën e dytë botërore, tha shefi i Departamentit për drejtësi dhe polici (EJPD).

Atëbotë askujt s'i ka shkuar mendja se në bazë të këtij ligji para drejtësisë zvicerane do të dilte dhe një historian i shquar turk, tha Blocheri, duke iu refereuar lirisë së shprehjes.

EJPD është për verifikimin e një ndryshimi të mundshëm të normës penale anti-raciste. Një gjë e tillë, ndërkaq, duhet aprovuar nga qeveria dhe parlamenti.

Blocher-i po bëhet "qesharak"

Për shoqatën Zvicër-Armeni, ministri në Ankara "i ka shpalosur çilimin e kuq" mohimit të genocidit, thuhet në një komunikatë. Blocheri është bërë "qesharak" gjersa dhe Halacoglun e ka karakterizuar si histiorian "të shquar". Pos kësaj, është diçka e padëgjuar që një ministër drejtësie të shpallë në botën e jashtme se nuk vlen gjë drejtësia zvicerane.

CVP shfaqet e tronditur

Edhe kryetari i CVP-së, Christophe Darbellay, kritikon paraqitjen e Blocher-it para mediave në Ankara. "Është e pazakontë të shohësh se si një ministër drejtësie i SVP-së vete në një vend i cili s'përbën aspak shembull në respektimin e të drejtave njerëzore, dhe pikërisht aty shpreh keqardhjen për pozitën e parlamentit zviceran" thotë ai.

Një ndryshim i mundshëm i normës penale anti-raciste për CVP nuk vjen në pyetje. Kjo, sipas saj, përbën një mjet efikas kundër ekstremistëve të djathtë. Tentimi i dobësimit të kësaj norme përbën gjithashtu një tentim që holokausti dhe genocidet tjera të përçmohen si "detaje historike". Kjo gjë është shokuese.

Edhe FDP-ja kundër ndryshimit

Edhe për shefin e fraksionit të FDP, Felix Gutzwiller, një ndryshim i mundshëm nuk vjen në shprehje. Kjo normë përbën një arritje të rëndësishme për Zvicrën liberale dhe laike. Ky ligj është gjithsesi akoma i ri dhe për këtë shkak mund të paraqiten probleme gjatë zbatimit. Ka pasur procese, me ç'rast mund të shtrohej pyetja, nëse ka qenë i arsyeshëm referimi në këtë ligj, tha Gutzwiller duke iu referuar situatës së rëndë në gjetjen e provave.

SP: Gjykatat mbeten të pavarura

Shefi i fraksionit të SP, Ursula Wyss, kritikoi faktin që ministri i drejtësisë po ngatërrohej në një proces gjyqësor: "Gjykatat zvicerane janë të pavarura dhe nuk janë në shërbim të Blocherit".

Gjykatat janë për të intepretuar ligjet dhe jo për të zbatuar pikëpamjet e anëtarëve të qeverisë. Qëndrimi i Blocherit është "jodemokratik"; ai duhet t'ia sqarojë vetes ndarjen e pushteteve dhe rolin e tij si ministër drejtësie.

Të blertit flasin për një skandal

Edhe të Blertit kanë protestuar kundër prononcimeve të Blocher-it. Me rastin e vizitës së tij ministri i drejtësisë ka lëshuar deklarata skandaloze për normën penale kundër racizmit, thuhet në një njoftim. Për një ministër zviceran drejtësie është e papranueshme ajo çfarë i ka lejuar vetes Blocher-i në Turqi. Blocher-i ka kritikuar normën penale kundër racizmit të aprovuar nga populli dhe parlamenti, pastaj është ngatërruar në një proces penal në zhvillim e sipër kundër dy mohuesve të genocidit dhe ka vënë në pikëpyetje genocidin kundër popullit armen.

Përkundrazi, presidenti i SVP, Ueli Maurer, as deshi të merrte ndonjë qëndrim për prononcimet e Blocher-it, dhe as për normën penale kundër racizmit.

Faktet

Norma penale kundër racizmit tekstualisht

Norma penale kundër racizmit është në fuqi prej 1 janarit 1995. Në një votim referendumian më 24 shtator 1994, populli votues u deklarua në masën prej 54,6% me Po kundrejt nenit të ri 261 në kodin penal zviceran. SVP-ja atëbotë, me përkrahjen e Christoph Blocherit, qartazi pati vendosur për parullën Po.

Neni përmban tekstin në vijim:

"Diskriminimi racial

Ai që bën thirrje publike për urrejtje ose diskriminim kundër një personi ose një grupi personash për shkak të racës, kombësisë ose religjionit të tyre,

Ai që përhap publikisht ideologji të orientuara drejt poshtërimit dhe etiketimit sistematik të pjesëtarëve të një race, kombësie ose religjioni,

Ai që me po këtë qëllim organizon a nxit aksione propagandistike, ose merr pjesë në to,

Ai që poshtëron ose diskriminon publikisht, në një mënyrë që shkel dinjitetin njerëzor, përmes fjalës, shkrimit, fotografisë, gjesteve, akteve ose në ndonjë mënyrë tjetër, një person ose një grup personash për shkak të racës, kombësisë ose të religjionit të tyre, ose që në bazë të njërit prej këtyre shkaqeve tenton të mohojë, të minimizojë në mënyrë të vrazhdë ose të justifikojë genocidin ose krime të tjera kundër njerëzimit,

Ai që ia mohon një shërbim të destinuar interesit të përgjithshëm, e të ofruar nga vetë ai, një personi ose një grupi personash, për shkak të racës, kombësisë ose religjionit të tyre,

do të dënohet me burg ose me gjobë."