Nomadët kërkojnë kampe

BERNË. (02.11.06) Komisioni për racizmin dhe fondacioni "E ardhmja e nomadëve të Zvicrës" kërkojnë një plan veprimi kundër diskriminimit të nomadëve në Zvicër. Ata akuzojnë Këshillin federal për mungesë kurajoje.

Diskriminimi i nomadëve po bëhet i dukshëm në shumë fusha, deklaroi kryetari i Komisionit federal kundër racizmit (EKR), Georg Kreis, në Bernë. Më së keqi është gjendja lidhur me banimin.

Sigurimi i vendngulimeve dhe vendpërqendrimeve dështon për faj të vullnetit të kantoneve, të ekzekutivave bashkiakë ose në referendumet popullore, thotë Kreis. Autoritetet janë shumëfish jofleksibël kur bëhet fjalë për kërkimin e lokacioneve alternative për nomadët.

Me këtë rast kantonet në planet e tyre të shfrytëzimit duhet të parashikojnë vende të mjaftueshme, me qëllim që nomadët të mund të jetojnë ashtu siç e kërkon tradita e tyre. Këtë gjë e pati vendosur Gjykata federale në një vendim në mars të vitit 2003. Kreis këtu e sheh edhe Këshillin federal përgjegjës. Ai kritikoi per faktin se qeveria po ushtron shumë pak trysni mbi kantonet.

Gjendja e nomadëve në Zvicër

Këshilli federal në raportin e tij të sapopublikuar lidhur me gjendjen e nomadëve në Zvicër ka konstatuar në fakt se mungojnë 29 vendngulime dhe 38 vendpërqendrime. Ndërkaq, propozimet për përmirësimin e situatës, për EKR dhe për fondacionin "E ardhmja e nomadëve të Zvicrës", nuk janë të mjaftueshme sa duhet. Tani ata nga Këshilli federal presin një plan veprimi. Mbi këtë bazë kantonet duhet të zhvillojnë krijimin e vendngulimeve dhe vendpërqendrimeve.

Armata duhet të vërë në dispozicion trojet

Kryetari i fondacionit, Werber Niederer, kërkon, pos tjerash, që në çdo kanton të vihen në dispozicion nga rezervat e armatës së paku nga dy troje për vendqëndrimet e nomadëve. Pos tjerash, për çfarëdo arsyeje publike, stacionimi duhet bërë i mundur të jetë legal për disa ditë.

Madje qeveria duhet të sigurojë dhe një sistem stimulues financiar. Ajo duhet të kujdeset që krijimi i lokacioneve të jetë edhe atraktiv për kantonet.

EKR dhe fondacioni duan pastaj që qeveria t'i paguajë shoqatës Rrota, një shoqatë ombrellë e jenishëve* të Zvicrës, më së paku nga 50.000 franga në vit, me qëllim që nomadët të kenë qasje me kosto të favorshme në këshillimet, sheshimet e kontesteve dhe në përfaqësimet juridike.

Po qe se këto masa të kërkuara nuk do të tregojnë ndonjë efekt për 5 vite, sipas EKR, do të ketë nevojë për një zgjidhje të nivelit federal, dmth. për një ligj.

*Jenishët - ciganët ose romët e Zvicrës, Francës, Gjermanisë dhe Austrisë

snc shqip:

bislim elshani

zvicra sot >>>

lajme nëntor 2006 >>>