Zvicra dëshiron rregulla të ashpra të OKB për të gjithë

NJU JORK. (20.09.06) Zvicra dëshiron një OKB të fuqishme, në të cilën të gjitha shtetet do t'u përmbaheshin rregullave. Për një gjë të tillë u angazhua presidenti federal, Moritz Leuenberger, në fjalimin e tij në prag të Kuvendit të përgjithshëm të OKB-së në Nju Jork.

Presidenti federal po merr pjesë në Takimin e nivelit të lartë të shefave të shteteve dhe të qeverive para hapjes së Kuvendit të 61-të të përgjithshëm të OKB-së. Në fjalimin e tij ai deklaroi se asnjë vend s'mund të përballojë i vetmuar sfida të tilla globale si terrorizmi, trafikimi i drogës, dëbimet nga vendet e punës ose katastrofat mjedisore.

Vetëm me lidhjen e përbashkët të të gjitha vendeve do të kemi një shans të tillë, tha Leuenberger. Po qe se OKB-ja dështon në detyrën e saj humanitare, dhuna dhe dëshpërimi do të marrin hov. Kjo gjë vërehet me një qartësi brutale në Lindjen e Afërme ose në Darfur.

Leuenberger citoi gjeniun e fizikës, Ajnshtajnin, si dhe psikologun, Sigmund Freud, të cilët qysh përpara 75 vitesh kishin rënë dakord se për një bashkëjetesë paqësore midis njerëzve është e nevojshme një organizatë botërore.

Organizata e zonja për reforma

Me një bindje të tillë para pesë vitesh zviceranët aprovuan hyrjen e Zvicrës në OKB, tha presidenti federal. Vitin e shkuar OKB-ja i hodhi poshtë kritikat si të pabaza dhe dëshmoi se organizata është e zonja për reforma.

Sipas Leuenbergerit, këtë e treguan krijimi i një Këshilli për të drejtat e njeriut dhe të një Komisioni për vendosjen e paqes. Reforma të tjera, ndërkaq, janë të nevojshme. Kështu psh., presidenti federal u angazhua për risime në Këshillin e sigurimit.

Leuenbereger nënvizoi rëndësinë e konventave së Gjenevës. Ato nuk janë pengesa për luftimin e terrorizmit. Presidenti federal e kualifikoi torturën si mohimin më radikal të shtetit juridik. Ai ftoi të gjitha vendet që t'i bashkoheshin gjykatës penale ndërkombëtare.

Presidenti federal u propozoi shefave të shteteve një sistem të përbërë prej tre shtyllash për zgjidhjen e konflikteve. E para do të ishte angazhimi për viktimat e katastrofave. E dyta, do të duhej të krijohej dhe të zbatohej një rend juridik. E treta, do ia vlente që të luftoheshin shkaqet e konflikteve.

snc shqip:

bislim elshani

zvicra sot >>>

lajme shtator 2006 >>>