Kundërshtarët e ligjit mbi azilin dhe të huajt nuk do të rrijnë duarkryq

BERNË. (26.09.06) Pas disfatës së 24 shtatorit 2006, kundërshtarët e ligjit mbi azilin dhe të huajt nuk duan të rrijnë duarkryq. Një organizatë që po ngritet pikërisht për këtë punë, do të mbikëqyrë me saktësi zbatimin e ligjeve.

Kështu psh. do të kontrollohet se me sa seriozitet do të trajtojnë autoritetet kërkesat për azil nga personat pa dokumenta, - deklaroi deputetja e vjetër, Ruth Dreifuss, në raportet e gazetave të Zvicrës perëndimore. Do të vëzhgohen gjithashtu edhe masat e detyrimit në fushën e azilit.

Akoma nuk është e qartë se ç'formë do të ketë organizata e re, deklaroi më tej Dreifuss. Është e sigurtë, ndërkaq, se ajo do të shërbejë si një pikë përqendrimi dhe se do të grumbullojë vëzhgimet e organizatave për mbrojtjen e të drejtave të njeriut, të kishave ose të parlamentarëve.

Ligjet për azilin dhe për të huajt parashikohet të hyjnë në fuqi në fillim të vitit 2008.

Respektimi i së drejtës ndërkombëtare

Do të ushtrohet gjithashtu ndikim që dispozitat t'u përmbahen ligjeve të së drejtës ndërkombëtare, tha Dreifuss. Më tej do të përqendrohet vëmendja në faktin se si do të rregullohet bashkimi familjar nga kantonet. Parimisht, bëhet fjalë që ligjet të zbatohen "në një formë të arsyshme dhe duke marrë në konsideratë dinjitetin njerëzor".

Walter Schmid, kryetar i Konferencës zvicerane për ndihma sociale dhe nënkryetar i Komisionit federal për të huaj, në emisionin "Tagesgespräch" (Biseda e ditës) të Radios zvicerane DRS, u shfaq i bindur se Zvicra "në rastin konkret nuk do të jetë josolidare". Në të shkuarën ajo e ka dëshmuar shumë herë këtë fakt.

Kështu psh. banorët e bashkisë Wiesen nga Bündneri janë angazhuar me këmbëngulje kundër dëbimit të një nëne kosovare dhe fëmijëve të saj, - tha Schmidt. Në rastin e Wiesenit, ndërkaq, as që bëhet fjalë për një komunë të majtë. Ngjarje të tilla do t'u tregojnë autoriteteve se çfarë është e mundur realisht të bëhet.

Eduard Gnesa, drejtor i Entit federal për migracion, në këtë emision tha se me ligjin e ri mbi azilin, si do që të zbatohet ai, nuk do të mund të pengohen kurrë të gjitha abuzimet. Këtë gjë nuk e arrin dot asnjë ligj në botë.

snc shqip:

bislim elshani

zvicra sot >>>

lajme shtator 2006 >>>