Rriten për 2,2 për qind premitë e sigurimeve shëndetësore

BERNË. (28.09.06) Ministri i shëndetësisë, Pascal Couchepin, ka theksuar tashmë: këtë vit premitë e sigurimeve shëndetësore rriten në një masë të përballueshme. Ai ka parashikuar rreth 3 për qind shpenzime plotësuese. Tani Enti federal i shëndetësisë (BAG) ka dhënë një vlerë akoma më të ulët: sigurimi bazë shëndetësor për vitin 2007 shtohet mesatarisht për 2,2 për qind. Me këtë rast, kjo rritje reflektohet krejt ndryshe nga kantoni në kanton. Ndryshime ka edhe sipas grupmoshave të ndryshme. Sa më i moçëm, aq më e lartë rritja.

Më me fat janë gjenevasit: ata vitin e ardhshëm do të paguajnë më pak. Tek të rriturit kjo zbritje përbën minus 0,5 %, ndërsa tek fëmijët madje - 2,3 %.

Më pak të kënaqur do të jenë të rriturit në Appenzell: shtimi i premive tek ta do të jetë për 4,8 %. Edhe banorët e Bernës do të gërmojnë më thellë nëpër xhepa se sa pjesët tjera të vendit. Ata do të paguajnë rreth 4,6 për qind më shumë.

Shkaqet e kësaj rritjeje të moderuar janë, në mes tjerash, rezervat bazike më të ulëta të sigurimeve shëndetësore. Pos kësaj, pozitivisht ka ndikuar dhe një ulje e lehtë e shpenzimeve shëndetësore. Dhe sipas BAG-ut, edhe përjashtimi i mjekësisë alternative ka shpënë në një zhvillim të frenuar të premive.

Ministri Couchepin është i sigurt se edhe vitin e ardhshëm premitë do të rriten vetëm pak. "Unë shpresoj që ky të përbëjë fillimin e një kthese në trend", - deklaroi ai në një konferencë për shtyp në Bernë.

Ndërrimi i sigurimit shëndetësor gjer në fund të nëntorit

Të siguruarit duhet që më së voni deri në fund të tetorit të informohen nga sigurimet për premitë e tyre individuale për vitin 2007. Kështu ata do të kenë kohë që gjer në fund të nëntorit të shkëputen nga sigurimet e tyre ose të mund të zgjedhin një tjetër formë sigurimi. Enti federal i shëndetësisë (BAG) ka lënë në dispozicion të të siguruarve një sërë ndihmesash, të cilat do të lehtësojnë vendimin për ndryshim sigurimi ose për zgjedhjen e ndonjë forme tjetër sigurimi. Kështu psh. mund të shkarkohet pa pagesë një pasqyrë e premive për krahasim bashkë me këshillat e vogla praktike. Në internet gjendet në dispozicion dhe një përqasje elektronike (http://www.bag.admin.ch/themen/krankenversicherung/00261/index.html?lang=de) e premive, me shkallë të ndryshme franshisash, si dhe me sigurimet HMO (Health Maintenance Organization - organizatë e përkujdesit shëndetësor) dhe me sigurimet sipas Modelit të mjekut familjar. Edhe këtu të gatshme për shkarkim janë informatat plotësuese këshillëdhënëse si dhe pasqyra e premive.

snc shqip:

bislim elshani

zvicra sot >>>

lajme shtator 2006 >>>