Në kantonin e Neuenburgut - Jo të drejtës së zgjedhjes pasive për të huajt

NEUENBURG. (04.10.06) Qeveria kantonale e Neuenburgut hë për hë nuk do t'u ofrojë të huajve zgjedhje nëpër poste politike në nivel kantonal. Ajo e hodhi poshtë iniciativën përkatëse për një gjë të tillë. Në vend të kësaj, ajo propozon të drejtën për zgjedhje pasive në nivel bashkiak.

Sipas pikëpamjes së qeverisë, akoma është heret që të huajve me leje qëndrimi C t'u pranohet e drejta për zgjedhje pasive, deklaroi të mërkurën përpara mediave deputeti kantonal, Bernard Soguel. Soguel nënvizoi, ndërkaq, se e drejta për zgjedhje pasive do të ishte "e dëshirueshme në një plan afatgjatë". Më parë, ndërkaq, ka nevojë për një hap të ndërmjetëm.

Për këtë arsye dëshirohet që iniciativës së arritur në dhjetor 2003 t'i kundërvihet një kundërpropozim. Kështu, qeveria kantonale do t'i propozojë këshillit të madh që të huajt të kenë mundësi të zgjidhen nëpër komuna. Përmes këtij projekti qeveria shpreson se mund të nxisë komitetin inicues që të tërhiqet nga aspirata e tij popullore.

Soguel përkujtoi se e drejta për zgjedhje pasive në nivel bashkiak tashmë kishte dështuar një herë. Në kohën kur parlamenti kantonal donte që këtë të drejtë ta fuste në kushtetutë, 56 për qind e popullit votues votuan kundër kësaj të drejte të re zgjedhore në një referendum të inicuar nga demokratët zviceranë.

Në Zvicër, krahas Neuenburgut, edhe kantonet e Appenzell Ausserrhoden-it, Freiburg-ut, Gjenevës, Graubünden-it, Jura-s dhe Waadt-it kanë zgjeruar ca të drejta politike tër veçanta edhe për popullsinë me prejardhje të huaj. Në asnjërin nga këto kantone, ndërkaq, të huajt nuk e kanë të drejtën që të kandidojnë për t'u zgjedhur në ndonjë post në rrafsh kantonal.

snc shqip:

bislim elshani

zvicra sot >>>

lajme tetor 2006 >>>