Një katamaran solar gjurmëve të Kristofor Kolombos

BAZEL. (17.10.06) Në Bazel, në praninë e ministres së jashtme Micheline Calmy-Rey, ka startuar katamarani i parë i modifikuar për energji diellore për të kapërcyer Atlantikun. Parashikohet që udhëtimi të zgjasë 6 muaj. Ky mjet udhëtimi i pazakontë do të duhej të arrinte Nju Jorkun në maj 2007.

"Ju jeni pionierë të guximshëm", përgëzoi ministrja e jashtme ekuipazhin e katamaranit 14 metra të gjatë dhe 6 metra të gjerë të vënë në lëvizje nga energjia diellore. Më në fund anija nisi lundrimin e saj nëpër Rin në drejtim të Rotterdamit, prej nga do të çohet në Spanjë.

Ky udhëtim rekord i veçantë nëpër Atlantik do të fillojë nga fundi i nëntorit në Seviljen spanjolle pastaj përmes Kapverdenit në Karaibe dhe më pas do të vazhdojë drejt Floridas. Prej aty ekuipazhi do të lundrojë përgjatë bregdetit në drejtim të Nju Jorkut, ku anija do të pritet nga kryetari i qytetit më 8 maj 2007.

Në ekuipazhin e "sun21" gjenden dy kapitenë nga Zvicra perëndimore, një mjek dhe aktivist mjedisor nga Bazeli, një historian si dhe një biolog ujërash detare e profesor i Universitetit të Bazelit, i cili këtë lundrim do ta shfrytëzojë për studime.

Rrugëtimi detar është i gjatë 7000 milje detare: sipas inicuesve të projektit, kurrë më parë një anije solare nuk ka qenë kaq gjatë në lundrim nëpër ujërat oqeanike. Projekti i kapërcimit të parë të Atlantikut me një anije solare sponsorizohet nga shoqata private "transatlantic21".

Me këtë projekt promotorët e tij duan të tregojnë se energjia solare zotëron një potencial të lartë edhe për sa i përket mjeteve të transportit ujor. Sepse, sipas pikëpamjes së tyre, një pjesë e madhe e anijeve të mallërave dhe e mjeteve turistike të lundrimit mund të mbahen në lëvizje përmes energjisë së rinovueshme solare.

Pas kapërcimit të Atlantikut, "sun21" do të vazhdojë të përdoret edhe më tej sipas nevojës. Kështu ai do të mund të shndërrohej në një anije ekskursioni. Kjo gjë, ndërkaq, akoma s'është vendosur.

snc shqip:

bislim elshani

zvicra sot >>>

lajme tetor 2006 >>>