Rregulla më të ashpra për bagazh dore edhe në aeroportet zvicerane

Në Zvicër me 6 nëntor hyjnë në fuqi rregullat e reja të BE-së për bagazh dore për aeroplanët. Shishkat, tubetat ose kutizat gjatë fluturimit në botën e jashtme nuk guxojnë të jenë më të mëdha se 100-mililitërshe ndërsa gjatë hyrjes ato duhet bartur në një qese të tejdukshme plastmasi.

ZÜRICH. (20.10.06) Që nga 6 nëntori pasagjerët e aeroplanëve duhet t'i kenë parasysh rregullat më të ashpra për bagazh dore. Shishkat lëngjembajtëse, dozat me gel, tubetat për pasta dhëmbësh si dhe produktmbajtës të tjerë, nuk guxojnë të jenë më të mëdha se sa një decilitër. Do të jetë e kufizuar edhe sasia e përgjithshme e tyre.

Me rregullat e reja për bagazh dore në aeroplan Zvicra i bashkohet kështu Unionit Europian, ku përcaktimet e ashpërsuara hyjnë në fuqi gjithashtu me 6 nëntor. Shkaku është mbrojtja më e efektshme nga terrorizmi.

Në të ardhmen të gjitha enët produktmbajtëse të transportuara në bagazh dore duhet të zënë një volum prej më së shumti një litri brenda një qese të tejdukshme plastmasi dhe që hapet e mbyllet. Gjatë kontrolleve të sigurimit këto qese duhet paraqitur ndaras. Përjashtim do të bëjnë vetëm ushqimet dietale, medikamentet dhe ushqimet për bebe.

Lëngjet e blera pas kontrolleve të sigurimit mund të merren në bord në sasi edhe më të mëdha se sa një decilitër, edhe më tej me bagazh dore. Lëngjet e blera më parë në aeroport, si psh. nga shitoret "duty-free", janë gjithashtu të lejuara, por vetëm në çanta me vulë speciale.

Gjatë kontrolleve të sigurimit xhaketat dhe mantelët duhet zhveshur. Laptopët dhe aparatet tjera të mëdha elektronike duhet paraqitur veçan, jashtë bagazhit të dorës. Brenda 6 muajsh pas hyrjes në fuqi të këtyre rregullave, pos tjerash, do të kufizohet dhe madhësia e lejuar e bagazhit të dorës ekzaktësisht në 56cm x 45cm x 25cm.

Për fillim pasagjerët nëpër aeroporte duhet të llogarisin me kohë më të gjata pritjesh. Zëdhënësja e UNIK, Sonja Zöchling, u rekomandon paragjerëve që të duken nëpër aeroporte nja 20 minuta më heret.

Rregullat e reja për bagazh dore vlejnë për të gjitha fluturimet nga Zvicra. Ato, sipas policisë, janë një reagim ndaj sulmeve të dështuara në Londër gushtin e shkuar. Terroristët, me gjasë, kanë dashur që gjatë rrugës për në SHBA ta hidhnin në erë aeroplanin përmes lëndëve eksplozive të lëngshme.

snc shqip:

bislim elshani

zvicra sot >>>

lajme tetor 2006 >>>