Kritikë kundër përgjithësimeve të Blocherit

Calmy-Rey mbron ndihmën për Afrikën

BERNË. (23.10.06) Ministrja Micheline Calmy-Rey dhe shefi i DEZA-s, Walter Fust, janë mbrojtur nga kritikat e ngritura prej Blocher-it lidhur me bashkëpunimin zhvillimor me Kontinentin Afrikan.

Afrika nuk i duhet lënë kurrsesi vetëvetes, apeloi Ministrja e jashtme. "Ai që do të kërkonte një gjë të tillë, do të dëshmonte një mosnjohuri të trashë të çështjes" sqaroi ajo në një intervistë për "SonntagsZeitung". Ndihma është e nevojshme, e mirë dhe ajo vazhdimisht do të kontrollohet për sa i përket efiçencës.

Në Komisionin politik shtetëror (SPK) Christoph Blocher është shprehur në mënyrë kritike lidhur me bashkëpunimin zhvillimor në Afrikë. Si një njeri i ekonomisë, ai nuk shihte ndonjë dobi prej saj, kishte thënë ai sipas një protokolli që po qarkullon nëpër media. Një mundësi do të ishte që kontinenti t'i lihet vetëvetes.

Edhe Walter Fust, shefi i Drejtorisë për bashkëpunim zhvillimor (DEZA), ka hedhur poshtë kritikën paushalle sipas së cilës ndihmat për Afrikën s'janë veçse para të hedhura nga dritarja.

Zvicra nuk jep ashtu thjeshtë para: "Ne punojmë si investitorë" tha Fust në një intervistë për "SonntagsBlick". Me këtë rast partnerët lokalë shqyrtohen ekzaktësisht. Projekte pa angazhimin e resurseve lokale nuk mbështeten prej DEZA-s.

Nuk ka zvogëlim të varfërisë

Faktin që, me gjithë ndihmën zhvillimore, varfëria nuk është ngushtuar, Fusti e shpjegon me zhvillimet demografike: më 1950 në Afrikë jetonin 270 milionë njerëz, gjersa më 2000 bëhej fjalë tashmë për 800 milionë. Të mbash hapin me një zhvillim të tillë është pothuajse e pamundur.

Fust shpreh keqardhjen për përshtypjen që ka lënë Blocheri me deklaratat e tij. Në këtë mënyrë u bëhet padrejtësi miliona njerëzve. Pos tjerash, nuk zgjidhet dot asnjë problem po qe se thjesht thuhet se "gjithsesi kjo nuk shërben gjë." Mirëpo për fat të keq duhet konstatuar se përgjithësime të tilla janë zotëruese në "qarqe të ndryshme në Zvicër".

snc shqip:

bislim elshani

zvicra sot >>>

lajme tetor 2006 >>>