Spitalet mësojnë qasjen ndaj migrantëve

Të kuptosh tjetrin është shëruese

BERNË. (24.10.06) Po qe se njerëzit nga kulturat dhe hapësirat e tjera gjuhësore do të trajtoheshin më mirë, a mund të ulëte kjo gjë edhe shpenzimet në një periudhë jo të largët kohore? Një manual bashkë me një film që e shoqëron atë do t'u ndihmojnë spitaleve se si t'u qasen migrantëve gjatë përballjes me nevoja të veçanta.

Sa i përket shëndetit, migrantët në Zvicër nuk kanë shanse të barabarta si vendësit, tha para mediave në Bernë Thomas Spang, shef i seksionit Barazia e shanseve dhe shëndetësia në BAG. Ata përfaqësohen mbiproporcionalisht tek shtresat e ulëta si dhe tek grupimet profesionale të keqklasifikuara.

Ata shpesh jetojnë në kushtet e një risku të lartë shëndetësor. Pastaj ata nuk e kanë të lehtë që të angazhohen për interesat e tyre. Jo vetëm pengesat gjuhësore, por edhe ato sociokulturore, ua ndërpresin atyre rrugën për tek sistemi shëndetësor zviceran. Fushatat parandaluese si dhe informacionet shëndetësore i përfshijnë në masë të pamjaftueshme migrantët.

Informacionet për organet drejtuese

Manuali "Diversiteti dhe barazia e shanseve" si dhe filmi shoqërues i shoqatës spitalore H+ si dhe i Entit federal për shëndetësi (BAG) duhet të ofrojnë ndihmën e nevojshme. Ato u dedikohen organeve drejtuese të spitaleve, klinikave dhe qendrave kurative. Libri dhe filmi u prezantuan në Bernë.

Për nevojë të librit janë vlerësuar përvojat nga projekti Migrant-Friendly Hospitals (spitalet miqësore për të huaj). Psh. çështja e përkthimit: sipas rastit mund të ftohen familjarët e pacientit, bashkëpunonjësit poliglotë ose përkthyesit. Mjete të tjera ndihmëse janë piktogramet dhe fjalorët.

Kurset profesionale duhet t'u ofrojnë bashkëpunonjësve sigurinë e duhur për përballjen me pacientë me prejardhje, gjuhë, apo religjion të huaj si dhe nga shtresa të ndryshme sociale. Në këtë mënyrë do të evitoheshin stresi dhe reagimet e gabuara. Kjo do të çonte në një efiçencë më të madhe dhe njëkohësisht te një kosto më e ulët e kurimit.

Në manual është i integruar dhe filmi dokumentar i xhiruar në "Spitalin ishullor" të Bernës me titull "Të kuptosh tjetrin është shëruese". Ai tregon shembuj nga tre klinika se si përjetohet spitali nga folësit e gjuhëve jo-zvicerane.

Siç njofton drejtoria e spitalit, më 2005, në "Ishullin" e Bernës, pothuajse çdo i pesti, ose mbi 27.036 pacientë, ishin migrantë ose migrante. Për çdo vit për përkthyes profesionalë shpenzohen rreth 300.000 franga.

Kjo shumë nuk mbulohet nga të ardhurat e sigurimeve dhe as që mjafton deri në fund. Diagnozat shumë komplekse kërkojnë jo vetëm një njohje kompetente profesionale, por edhe shumë kohë.

snc shqip:

bislim elshani

zvicra sot >>>

lajme tetor 2006 >>>