Një kapitull i errët në të kaluarën zvicerane

BERNË. (26.10.06) Këshilli federal duhet të zhdëmtojë viktimat jugafrikane për politikën zvicerane gjatë apartheidit, për shkak të shkeljes së rëndë të të drejtave njerëzore.

Kjo gjë kërkohet nga fushata për kërkim ndjese dhe zhdëmtim në Afrikën e Jugut (KEESA). Sipas një njoftimi për mediat, 268 personalitete dhe 17 organizata nga politika, kultura, shkenca, kisha dhe Bashkëpunimi zhvillimor kanë nënshkruar letrën e hapur përkatëse të KEESA-s. Mes tyre janë dhe ca deputetë të PS të të dyja dhomave të parlamentit.

Zvicra ka mbajtur një qëndrim mbështetës kundrejt regjimit të apartheidit, thuhet në letër. Kjo ka kontribuar që burgosjet e rrëmbimet, pastaj përdhunimet, shpërnguljet e dhunshme, tortura e represioni, si dhe shkeljet e të drejtave të njeriut me legjitimim shtetëror, të zgjasnin kaq shumë.

Një raport i përpiluar nën drejtimin e historianit Georg Kreis flet për një "kapitull të errët të së kaluarës zvicerane". Bashkëpunimi politik dhe ekonomik i Zvicrës me regjimin e apartheidit të Afrikës jugore ka qënë shumë më intensiv se ç'është pandehur më parë.

Kontaktet midis ekonomive, armatës dhe shërbimit të fshehtë të të dyja vendeve kanë qenë më intensive në vitet 80, pikërisht atëherë kur shkeljet e të drejtave njerëzore nga regjimi i pakicës së bardhë kishin arritur kulmin. Ndërkaq, mospjesëmarrja zvicerane në sanksionet ndërkombëtare e kishte forcuar regjimin e apartheidit.

Këshilli federal deri më tash nuk ka marrë qëndrim lidhur me rezultatet e hulumtimit, shkruan KEESA. Këshilli federal tani duhet të njohë gabimin dhe bashkëpërgjegjësinë për vuajtjet kundrejt viktimave të apartheidit dhe të kërkojë falje për këtë gjë.

Viktimat e apartheidit duhet të marrin dhe një zhdëmtim substancial, ashtu siç ka ndodhur në raste të ngjashme përmes vendimeve gjyqësore të gjykatave ndërkombëtare për të drejtat e njeriut.

snc shqip:

bislim elshani

zvicra sot >>>

lajme tetor 2006 >>>