Pagat zvicerane nën trysni

Vetëm 4 vite pas futjes së lëvizjes së lirë të njerëzve me BE-në, Federata sindikale e Zvicrës (SGB) konstaton se pagat në sektorët pa kontrata të përgjithshme të punës (GAV) pjesërisht janë ulur ndjeshëm.

BERNË. (30.10.06) Ulja nën vlerën reale e shumë pagave në varësi të vendit dhe profesionit, në vazhdën e lëvizjes së lirë të njerëzve, është një realitet, tha sot para gazetarëve Daniel Lampart, sekretar i përgjithshëm i SGB. Në sektorët me kontrata të shpallura obligative të punës për të gjithë, duket sikur dumpingu i pagave, falë definimit të pagës minimale, është nën kontroll. Ndryshe puna në sektorët pa kontrata të përgjithshme obligative (GAV), para së gjithash te punëmarrësit që ushtrojnë veprimtari të thjeshta.

Zhvillime të llogaritura sipas sektorëve

Federata sindikale llogarit, psh., për kopshtarinë, se pagat mesatare në harkun kohor midis tetorit 2002 dhe tetorit 2004 kanë rënë për 25,6% në 2.570 franga në muaj. Për 10,9 për qind kanë rënë pagat në sektorët e teknologjisë informative dhe të shërbimeve për ndërrmarjet, ndërsa për 8,1 për qind në sektorët e zbavitjes, kulturës dhe sporteve.

Sipas SGB, ndërkaq, në sektorët e ndërtimtarisë dhe të hotelierisë, të cilët i njohin kontratat e përgjithshme obligative të punës, niveli i pagave në harkun e njëjtë kohor, përkundrazi, është rritur. Edhe në vitin në vazhdim, në kopshtari, por edhe në bujqësi, tek firmat e vogla pastruese/higjenike dhe tek muzikantët, janë vënë re gjithnjë e më shpesh paga nën vlerën reale, sqaron Lampart.

Kërkohen kundërmasa

SGB kërkon që tani për sektorët problematikë të vihet në zbatim instrumentariumi i vënë në dispozicion me masat paralele kundër dumpingut të pagave. Çelësi për mbrojtjen e pagave janë kontratat e mira të përgjithshme të punës si dhe pagat minimale, thotë kryetari Rechsteiner.

Kështu psh. pagat në kopshtari mund të stabilizoheshin përmes zgjerimit të fushës së vlefshmërisë së kontratave vendore kornizë për ndërmarrjet ndërtimore. Në rastin e ndërmarrjeve të vogla pastruese/higjenike, sipas SGB, mund të shpalleshin si obligative pagat minimale nga GAV (kontratat e përgjithshme të punës) për ndërmarrjet e vogla dhe të mesme. Në sektorin e kulturës shtegu duhet gjetur përmes kontratave normale të punës.

Federata sindikale prezantoi, njëkohësisht, një version të saj të plotësuar dhe të përditësuar të llogaritarit të pagave në internet. Të dhënat janë aktualizuar në bazë të strukturës së përmbledhur të pagave 2004 realizuar nga qeveria, ndërsa numri i sektorëve të përfshirë në të është plotësuar për 7.

snc shqip:

bislim elshani

zvicra sot >>>

lajme tetor 2006 >>>