HIV-i më i shpeshtë tek homoseksualët

BERNË. (31.10.06) Brenda tre vitesh numri i të infektuarve me HIV midis homo- dhe biseksualëve në Zvicër është pothuajse dyfishuar. Enti federal për shëndetësi (BAG) në raportin e tij të publikuar sot flet për një tendencë shqetësuese.

Sipas BAG-ut, që nga vitit 2004 infektimet me HIV vazhdimisht po shtohen brenda homo- dhe biseksualëve, gjersa numri i përgjithshëm i infektimeve është në rënie. Nga të gjithë meshkujt e infektuar në vitin 2005, 49,3 për qind i takonin grupit të ashtuquajtur MSM - meshkuj që bëjnë seks me meshkuj. Në vitin 2004 ishin akoma 36,5 për qind.

Në këtë grupim gjer në fund të vitit BAG llogarit të shfaqen dhe rreth 300 infektime të reja, gjë që sërish do të nënkuptojë një shtim të ndjeshëm. Shumica e meshkujve të infektuar me virusin HIV janë zviceranë.

Një tendencë në Evropën Perëndimore

Me një zhvillim të tillë, sipas BAG, Zvicra nuk është e vetmuar. Një tendencë e ngjashme mund të vihet re në shumicën e vendeve evroperëndimore. Përgjithësisht tek meshkujt homoseksualë dhe biseksualë mund të shquhet tendenca e sjelljes rrezikuese. Gjithnjë e më shumë meshkuj kanë pasur marrëdhënie të pambrojtur seksuale me partnerë të alternuar.

Por edhe prevencioni qartazi muk mirëpritet më. Siç shkruan më tej BAG, një pjesë e homoseksualëve tregon njëfarë mërzie, ngaqë mesazhet parandaluese, sipas tyre, cënojnë ambientin festiv.

Apel organizatave të të prekurve

Për këtë shkak BAG kërkon nga shoqatat e homoseksualëve që sërish të vendosin në qendër të përpjekjeve të tyre parandalimin e HIV-it. Gjithsesi BAG nuk e sheh të nevojshme të ndryshohen masat ekzistuese. Shumë më e rëndësishme është që të gjitha organizatat që marrin pjesë në luftimin e AIDS-it brenda grupimit MSM, të kooperojnë më efektivisht.

Se masat parandaluese synojnë aty ku duhet, sipas BAG-ut, tregojnë zhvillimet mes migrantëve dhe personave nga skena e drogës. Tek ta numri i infektimeve ka mundur të ulet. Gjer në fund të shtatorit të vitit në vijim në mesin e tyre janë paraqitur gjithësej 533 prova me HIV pozitiv. Sipas BAG-ut, kjo i përgjigjet vlerave të vitit 2005, kur gjatë gjithë vitit u paraqitën gjithësej 714 raste. Shumica prej tyre, rreth 66 për qind, ishin meshkuj. Sipas këtij institucioni, në tre vitet e shkuara qe stabilizuar gjerësisht edhe shkalla e vdekshmërisë - rreth 90 raste vdekjesh në vit.

snc shqip:

bislim elshani

zvicra sot >>>

lajme tetor 2006 >>>