Raporti i UNDP i vitit 2006 lidhur me zhvillimin e njerëzimit

Uji si një faktor kyç i zhvillimit

Para së gjithash vendet në zhvillim tregojnë një deficit kolosal në fushën e ujit të pijshëm dhe të higjienës komunitare. Kështu rezulton nga raporti vjetor i programit zhvillimor të OKB - UNDP-së i paraqitur pak kohë më parë. Siç dëshmon një fushatë sensibilizuese në Peru, në këtë sektor të rëndësishëm është e angazhuar dhe DEZA.

BERNË. (05.01.07) Secili njeri do të duhej që brenda një dite të kishte në dispozicion së paku 20 litra ujë të pastër, këtë e kërkon Raporti vjetor i UNDP-së 2006 nën titullin "Jo vetëm çështje ngushtësie: fuqia, varfëria dhe kriza globale për ujë". Realiteti, ndërkaq, duket ndryshe. Sipas këtij raporti, 1,1 miliardë njerëz nuk kanë qasje të rregullt në ujin e pastër. Rreth 2,6 miliardë njerëz jetojnë pa pajisje sanitare elementare, si psh. nevojtoret. Si pasojë, për këtë shkak vdesin nga 1,8 milionë fëmijë nga sëmundjet e barkqitjes.

Iniciativa "Manos limpias, niños sanos"

Edhe për DEZA-n tema e ujit të pijshëm dhe e higjienës komunitare është me rëndësi të madhe. Kështu psh. ajo në Peru po mbështet një fushatë sensibilizimi që ka filluar me 2005. Porosia e saj themelore është: larja e duarve të mbron nga sëmundjet. Kjo porosi arrin tek shtersat më të varfra të popullsisë, si në zonat urbane, ashtu dhe në ato rurale, në formë inovative, përmes emisioneve të radios dhe televizionit, reklamave nëpër gazeta si dhe përmes internetit. Pos kësaj, gjer në fund të prillit 2006, 3400 persona kanë marrë arsimin e duhur profesional me qëllim që njohjet e tyre t'i shpërndajnë direkt tek nënat dhe fëmijët. Hapi i parë për ndryshimin e zakoneve, e me këtë edhe për uljen e sëmundjeve të barkqitjes, tashmë është bërë. Në bazë të anketimit, tani 72% e fëmijëve nën moshën 12-vjeçare e njohin rëndësinë jetike të larjes së duarve me sapun - gjë që nënkupton një rritje prej 32 % që nga fillimi i fushatës.

Sipas raportit vjetor të UNDP-së, uji dhe shërbimet sanitare luajnë një rol kyç në luftimin e varfërisë. Në pajtim me këtë, DEZA në këtë sektor investon mjete të rëndësishme, rreth 95 milionë franga në vit. Investimi është i levërdisshëm, thekson François Münger, përgjegjës i DEZA-s për çështje të ujit: asgjë nuk është më e favorshme dhe më e dobishme se sa investimet në furnizimin me ujë dhe në higjienën komunitare. Në këtë mënyrë parandalohen sëmundje, shërimi i të cilave do të kërkonte shpenzime shumëfish më të mëdha.

snc shqip:

bislim elshani

zvicra sot >>>

lajme janar 2007 >>>