"Tërmet gjeotermik" me forcë prej 3,1 në bazel

BAZEL. (09.01.07) Të shtunën në mëngjez sërish ka pasur dridhje toke në Bazel: Shërbimi seizmologjik zviceran (SED) në orën 8.19 ka regjistruar një dridhje të forcës prej 3,1 të shkallës së Rihterit. Epiqendra e tij ka qenë në afërsi të vrimës së hapur nga projekti gjeotermik që në fillim të dhjetorit shkaktoi një tërmet me fuqi prej 3,4.

Në bazë të një njoftimi të Shërbimit seizmologjik zviceran (SED), sipas nivelit të sotëm të dijeve, bëhet fjalë për një pasojë të presionit të lartë të ujit i cili u çua drejt thellësive. Ky ujë do të duhej që në një thellësi prej 5000 metrash të plasariste shkëmbinjtë prej graniti për t'i bërë të përshkueshëm nga uji. Më pas ky ujë do të tejçohej me qëllim përftimi të ngrohjes dhe të energjisë.

Sipas SED, tërmeti do të ketë qenë mjaft i ndjeshëm në afërsi të epiqendrës. Edhe në lagjet e banimit në anën tjetër të Rinit ai do të jetë perceptuar qartë.

Sipas një njoftimi të përgjegjësve të projektit nga Geopower Basel AG, tërmeti pjesërisht është perceptuar edhe si një "zhurmë përplasjeje". Policia dhe zjarrfikësit e Bazelit kanë regjistruar rreth 40 thirrje telefonike; të plagosur nuk ka pasur. Edhe në Lörrach e në Weil të Gjermanisë policia ka pasur telefonata.

Nga një tërmet i fuqisë së tillë SED nuk pret ndonjë dëm. Geopower u lutet të dëmtuarve të mundshëm që gjithsesi të paraqiten. Pas dridhjes së ndjeshme të 8 dhjetorit kanë arritur rreth 450 paraqitje dëmesh.

Projekti është ndërprerë

Atëbotë tërmeti i shkaktuar nga pilot-projekti gjeotermik, i një fuqie prej 3,4, pati tmerrruar shumë njërëz në Bazel dhe rrethinë. Pas një duzine tërmetesh të dobëta, ai ishte i pari që u ndje qartë. Si pasojë, drejtuesit e projektit dhe autoritetet vendore u kritikuan gjerësisht: projekti i ngrohjes nga toka përkohësisht u ndërpre.

Drejtuesit e projektit të befasuar

Për drejtorin e projektit, Markus Häring, tërmeti i ri i ndjeshëm i së shtunës kishte qenë i papritur. Pas ndërprerjes së projektit, presioni i ujit ishte reduktuar në nivel të natyrshëm. Është llogaritur me zhdukjen e ngadalshme të lëvizjeve, pa përjashtuar edhe dridhje të tjera. Konsekuencat tani akoma janë të hapura.

Vetëm një javë pas tërmetit të 8 dhjetorit Bazeli qe tronditur nga një tërmet pasues i një fuqie prej 2,5 - edhe ky si një pasojë e vonuar e projektit gjeotermik. Atëherë u tha që nuk mund të përjashtoheshin tërësisht edhe tërmete të tjera pasuese të dobëta. Dhe vërtetë që pas asaj kohe pasuan dhe 8 tërmete të tjera nën pragun e perceptimit njerëzor.

Ky i së shtunës, ndërkaq, sërish qe i perceptueshëm qartë - përafërsisht, ashtu si kur shembet një dollap në banesën fqinjë. Häring s'mundi të thoshte gjë se ç'kuptim ka kjo gjë dhe nëse edhe në të ardhmen do të priten dridhje të tjera të ndjeshme: më parë duhen evaluuar të dhënat më të reja.

Për një analizë të situatës të shtunën u takuan me përgjegjësit e projektit kryebashkiakja e qytetit të Bazelit, Barbara Schneider, dhe shefi i departamentit të sigurisë, Hanspeter Gass.

Nuk u vendos për ndonjë masë të re. Admnistrata e Bazelit parashikohet që të marrë vendim lidhur me të ardhmen e këtij projekti pionier nga fundi i janarit.

snc shqip:

bislim elshani

zvicra sot >>>

lajme janar 2007 >>>