Injorim kufijsh në rast lufte kundër terrorit

BERNË. (10.01.07) Në të ardhmen, në rastin e një kërcënimi terrorist përmes mjeteve fluturuese civile, aeroplanët luftarakë do të mund të fluturojnë pa pengesë sipër kufijeve të Zvicrës dhe Gjermanisë.

Qeveria vendore ka miratuar një marrëveshje ndërshtetërore që mundëson një bashkëpunim tejkufitar në rast sulmesh terroriste me mjete fluturuese civile. Siç njofton Departamenti federal për mbrojtjen, mbrojtjen popullore dhe sportin (VBS), marrëveshja parashikon një këmbim të gjerë informacionesh lidhur me gjendjen e përgjithshme në trafikun ajror.

Pa ndërhyrje me armë dhe pa të shtëna paralajmëruese

Pos kësaj përmirësohet dhe mundësia e intervenimit të të dy partnerëve në rastin e një kërcënimi konkret. Kështu psh. sipas marrëveshjes, në të ardhmen policia ajrore gjatë fluturimit mund të kapërcejë kufirin dhe nën komandën e vendit pritës të ndërmarrë një identifikim sigurie si dhe të përcjellë dhe të vëzhgojë fluturaken e dyshimtë. Ndërkaq, për shkak të bazës ligjore në Gjermani, me këtë rast nuk bën të përdoren armët, përjashtohen, madje, edhe të shtënat paralajmëruese.

Marrëveshja do të jetë në fuqi para fillimit të kampionatit evropian të futbollit Euro 08. Kuvendet federale do të vendosin për të në sesionin e ardhshëm veror dhe vjeshtor.

Marrëveshja e tillë ekziston tashmë me Francën dhe Italinë

Që nga 11 shtatori 2001 Zvicra ka përforcuar bashkëpunimin në hapësirën ajrore me fqinjët. Me Francën dhe Italinë ekzistojnë tashmë marrëveshje lidhur me intervenimet tejkufitare të policisë së trafikut ajror. Në kundërshtim me marrëveshjen me Gjermaninë, me këtë rast është parashikuar edhe intervenimi me armë për qëllime paralajmëruese.

snc shqip:

bislim elshani

zvicra sot >>>

lajme janar 2007 >>>