Në Zvicër uragani „Kyrill“ shkakton dëme të lehta

Me 225 kilometra në orë uragani "Kyrill" ka arritur dhe alpet zvicerane. Në ultësira ai ishte mbi 100 km/h. Në Cyrih pati dy të plagosur lehtë. Dëme të mëdha nuk janë lajmëruar.

BERNË. (19.01.07) Siç njofton shërbimi meteorologjik Meteomedia, vlera më e lartë në gjithë Europën prej 225 kilometrash në orë u regjistrua në Konkordiahütte (Kasolla e Konkordias) në masivin akullnajor zviceran Aletsch. Meteoschweiz këtë vlerë nuk e vërtetoi dot. Mund të rezultojnë vlera të ndryshme sipas metodës matëse, tha një zëdhënës i shërbimit meteorologjik nacional.

Sipas të dhënave të Meteoschweiz, stuhitë maksimale nëpër rrafshira kishin arritur deri në 100 km/h. Në Cyrih, madje, kishin qenë 132 km/h ndërsa në Lucern 112 km/h. Në Jungfraujoch u regjistrua shpejtësia më e madhe e erës prej 150 km/h; sidoqoftë, në Säntis ajo kishte arritur shpejtësisnë prej 144 km/h.

Të lënduar në Cyrih

Në Cyrih një pensioniste pësoi lëndim në supe nga një pllakat i hedhur nga shakullina në Bellevue. Një pensionisti i ra mbi kokë një saksi.

Në aeroportin Cyrih-Kloten janë anulluar dhe 14 fluturime të tjera. Që nga paraqitja e shtërngatës janë regjistruar gjithësej 105 anullime që kanë goditur disa mijëra veta.

Te Gontenbad AI në mëngjez një bredh u rrëzua sipër përçuesve elektrikë të hekurudhave të Appenzellit. Të lënduar nuk pati. Qarkullimi i trenave midis Appenzellit dhe Gontenit u ndërpre.

Sipas të dhënave të SBB që nga paraditja sërish po qarkullojnë trenat midis Kreuzlingenit dhe Konstancës. Në Bodense sërish po lundron autoboti midis Romanshornit dhe Fridrichshafenit.

Pemë të rrëzuara

Në trafikun rrugor nuk pati ndërprerje të mëdha, vetëm ndonjë rrugë u desh të bllokohej për shkak të pemëve të rrëzuara.

Kështu psh. shumë prej afro 40 lajmërimeve që u paraqitën gjatë natës në policinë kantonale të Cyrihut, kishin të bënin me pemët e rrëzuara, që kishin bllokuar rrugën. Në policinë kantonale të Bernës kishin arritur 40 lajmërime për dëme.

Deri në mesditë duhet llogaritur edhe më tej me stuhi. Pasdite, sipas Meteoschweiz, shtërngata do të bjerë krejtësisht.

Në Europë 40 të vdekur nga shtërngata

Pas uraganit të rëndë "Kyrill" numri i viktimave me pasojë vdekjen në Europën e mesme dhe perëndimore u rrit deri të premten në mëngjez në 40 veta.

Në Britaninë e Madhe u lajmëruan 12 raste vdekjesh, në Gjermani 10, në Holandë 6 dhe në Çeki 4. Bilanci më i ri i viktimave nga Polonia jep 4 të vdekur. Në Francë vdiqën dy veta në veri të vendit, ndërsa në Belgjikë, sipas njoftimeve nga shtypi, ka pasur së paku dy të vdekur nga shtërngata.

snc shqip:

bislim elshani

zvicra sot >>>

lajme janar 2007 >>>