Ligji më i ashpër dhe integracioni kundër dhunës ndër të rinjtë

Popullsia zvicerane dëshiron që përmes masave më të forta represive si dhe përmes integracionit të përmirësuar të veprojë kundër problemit të dhunës ndër të rinjtë. Sipas një ankete të Institutit gfs.bern të publikuar të djelën, 7 në 10 të anketuar janë shprehur për mundësinë e rimarrjes (heqjes) së nënshtetësisë delikuentëve të rinj zviceranë me prejardhje të huaj.

BERN. (22.01.07) Siç rezulton nga anketa e realizuar nga Instituti kërkimor gfs.bern, me porosi të SRG SSR Idee suisse, në të gjithë vendin 70% nga mbi 2000 të anketuar janë deklaruar për ashpërsimin e së drejtës penale rinore.

Dallime të mëdha rajonale

Gjithashtu, në anketën gjithëzvicerane, 70% e aprovojnë mundësinë e një çnatyralizimi (heqje nënshtetësie) për delikuentët e rinj me prejardhje të huaj. Me këtë rast gjithsesi paraqiten dallime të mëdha rajonale dhe partiako-politike.

Gjersa në Zvicrën gjermane, 74%, ndërsa në atë italiane, 64% e të anketuarve e aprovojnë një masë të tillë, në Zvicrën franceze bëhet fjalë vetëm për 51%.

Për mundësinë e shtetësi-heqjes, ndërkaq, më së qarti shprehet elektorati i SVP-së, me 87%. Zgjedhësit nga FDP dhe CVP e aprovojnë këtë mundësi me 76%, përkatësisht, 64%.

57% e zgjedhësve të anketuar nga SP-ja do të përshëndesnin mundësinë e rastit për çnatyralizim. Zgjedhësit e blertë e hedhin poshtë atë me një diferencë minimale.

Integracioni i përmirësuar

Krahas represionit më të ashpër, popullsia zvicerane do të angazhohej edhe për një integracion të përmirësuar. 79% e të anketuarve shprehen për një përforcim të përpjekjeve në integrimin e migrantëve të rinj.

Aprovimi i kësaj në Zvicrën frengjishtfolëse rezulton më i fortë, me 88%, se sa në Zvicrën gjermane, me 77%. Rreth 69% e të anketuarve në Zvicrën italiane shprehen për masa të përforcuara.

Integracioni më i mirë ka fituar një shumicë të qartë tek zgjedhësit e të katër partive qeverisëse. Më e dukshme kjo shumicë duket tek SP-ja, me 92%, para CVP-së dhe FDP-së, me 82% secila.

snc shqip:

bislim elshani

zvicra sot >>>

lajme janar 2007 >>>