Zvicra tejet e motorizuar

NEUENBURG. (25.01.07) Në çdo dy banorë një automobil: Zvicra bën pjesë kështu ndër vendet më të motorizuara europiane. Nëpër rrugët e saj qarkullojnë mbi 5 milionë automjete të regjistruara. 70 për qind syresh janë vetura.

Siç njofton Enti federal statistikor, më 30 shtator 2006 në Zvicër ishin të regjistruara 5.11 milionë automjete, 65 mijë më shumë se vitin paraprak. Shumicën dërrmuese e përbënin veturat. Pasonin motoçikletat (609 mijë) si dhe kamionët e furgonët (314 mijë).

Këtyre u shtohen dhe 185 mijë automjete bujqësore me targa të blerta si dhe 53.500 automjete industriale me targa blu dhe kafe. Kusurin e fondit e përbëjnë busët, kamionetat dhe autoshtëpizat.

Në Europa-Top

Në 1000 banorë i bie të jenë 523 vetura. Në këtë mënyrë, Zvicra bashkë me Gjermaninë, Italinë, Lihtenshtainin, Luksemburgun, Portugalinë dhe Islandën, bën pjesë ndër vendet tejet të motorizuara të Europës. Në kundërshtim me këto vende, shkalla e motorizimit e vendeve të Europës Veriore është më e ulët.

Në Zvicër ka më shumë vetura në vendet rurale se sa nëpër qytete, ndërkaq në qytete më shumë motoçikleta se sa në fshatra. Numri i veturave në zonat rurale sillet në 546 makina në 1000 banorë, gjersa nëpër qytete vetëm 515. Makinat 4WD (me shtytje 4-rrotëshe) ndeshen më shpesh në fshatra se në qytete (23 kundrejt 14 për qind).

Në rastin e veturave, 88 për qind syresh punojnë me benzinë ndërsa 12 për qind me naftë (diesel). Automjetet me burime të tjera energjetike (elektricitet ose gaz) përbëjnë më pak se 0,2 për qind. Këtu janë llogaritur dhe automjetet hibride, që vihen në lëvizje edhe me benzinë.

snc shqip:

bislim elshani

zvicra sot >>>

lajme janar 2007 >>>