Forumi i hapur në Davos 

Calmy-Rey: "Një kulturë unikale do të ishte fundi i kulturës"

DAVOS. (29.01.07) Presidentja federale Micheline Calmy-Rey përkujtoi në Davos traditën shumëkulturore në Zvicër dhe apeloi: "Edhe sot ne duhet të krijojmë vend për etni të ndryshme."

Në fjalimin e saj që hapi diskutimin e podiumit në manifestimin paralel Forumi i hapur të WEF, lidhur me temën "Shoqëria multikulturore: një iluzion?", Micheline Calmy-Rey përkujtoi faktin se një shoqëri multikulturore qysh në vitet 90 pati shkaktuar asociacione optimiste. "Multi-kulti bën që bota të shfaqet më interesante, më shumëngjyrëshe, më e larmishme."

Në ndërkohë ky nocion në ndonjë rast u shndërrua dhe në sharje. Mirëpo, edhe zviceranët kanë identitete të ndryshme. Ajo vetë është një zviceranoperëndimore, një femër, e edukuar si katolike dhe socialdemokrate. "Mirëpo si ministre unë përfaqësoj edhe gjermanozviceranët, hebrenjtë dhe muslimanët."

Përmes izolimit akoma më të huaj

Në kombin e vullnetshëm katërgjuhësh zviceran secili grupim duhet të respektojë edhe të tjerët në ndryshueshmërinë e tyre. "Të gjithë kanë të drejtën që të krenohen me identietin e tyre. Federalizmi është një mozaik shumëngjyrësh, një barazpeshë e drejtpeshuar."

Migracioni që prej kohësh e ka pasuruar këtë vend. Ardhacakët gur pas guri janë përfshirë në këtë mozaik. "Shikuar historikisht, Zvicra përbën një histori të pashembullt suksesi në integrim."

Kryeministrja pranoi se migracioni mund të çojë edhe në tendosje, "por përmes izolimit, të huajt bëhen akoma më të huaj. Ndërkaq vlerat nuk janë direktiva. T'i zhvillosh më tej vlerat, t'i këmbesh ato me të tjerët, kjo përbën një proces shoqëror", pasiqë: "Kultura gjithmonë është multi, një kulturë unikale do të ishte fundi i kulturës."

Minaretë: dalja nga statusi i ulët

Diskutimi i mëtejshëm u soll para së gjithash rreth raporteve midis zviceranëve dhe migrantëve muslimanë. Me këtë rast u bë fjalë për problematikën e migrimit dhe për qasjen ndaj pakicave religjioze, tha Rifa'at Lenzin, studjuese e islamizmit dhe nënkryetare e Grupimit ndërfetar të punës të Zvicrës.

"Bota e krishterë e ka të vështirë integrimin e bashkësive të tjera fetare. Madje edhe religjioni çifut sot e kësaj dite nuk është i njohur zyrtarisht në të gjitha kantonet." Të mundësosh ndërtimin e minareve, kjo do të thoshte gjithashtu t'u japësh një shans muslimanëve që të dalin nga statusi i ulët i sallave të depove, garazhave dhe bodrumeve dhe në këtë mënyrë "të krijosh transparencën".

"Integracioni është një punë e mundimshme"

Zviceranët nuk janë kundër ushtrimit të religjioneve, por kundër "bërjes së tyre të dukshme publikisht", ndërhyri Thomas Wipf dhe përkujtoi lirinë e fesë dhe të besimit. Presidenti i Lidhjes kishtare ungjillore mbrojti pikëpamjen që integracioni s'duhet bërë në mënyrë pasive por aktive. "Politika e migracionit nuk duhet përmbushur me të drejtën ndërtimore. Integracioni kërkon një angazhim të mundimshëm."

Jam ftuar "të luaj rolin e të keqit", e mori me shpoti deputeti i Këshillit nacional nga SVP-ja e Cyrihut, Hans Fehr. "Muslimanët, janë njerëz që pjesërisht nuk e akceptojnë sistemin tonë juridik". Sheriati - e drejta islame - duket sikur ka një status më të lartë "se sa normat tona juridike."

Dialogu dhe shpërbërja e paragjykimeve

Pos kësaj, ndryshimet në mentalitet midis vendësve dhe muslimanëve janë të mëdha. Ndonjëherë dhuna në zgjidhjen e ndonjë konflikti luan një rol krejt tjetër. Kjo çon pastaj në shkaktimin e problemeve nëpër shkolla dhe në kriminalitet.

Susan Collin Marks nga OJQ-ja e specializuar për zgjidhjen e konflikteve "Search for Common Ground" përkujtoi bisedimet e suksesshme të pajtimit në Afrikën e Jugut dhe mbrojti idenë e dialogut, koekzistencës, të zhdukjes së paragjykimeve dhe të vendosjes së besimit reciprok.

Ç'është në fakt "Forumi i hapur" në Davos

Forumi i hapur në Davos ëshë një manifestim i përbashkët i Lidhjes kishtare ungjillore të Zvicrës dhe Forumit ekonomik botëror.

Sivjet, më 2007, ky forum u mbajt për të pestën herë me radhë dhe përbëhej nga shtatë diskutime podiumi (tribuna) lidhur me temat e ndihmës zhvillimore, pagat e menaxherëve dhe ndryshimet klimatike.

Në kundërshtim me Forumin ekonomik botëror të izoluar në mënyrë hermetike nga forcat policore dhe ushtarake, Forumi i hapur ishte publik. Një ide e Forumit të hapur është edhe që përmes tij të përfshihen zërat e kritikëve të globalizimit në WEF (Forumin ekonomik botëror).

snc shqip:

bislim elshani

zvicra sot >>>

lajme janar 2007 >>>