Migrantët më pak të shëndetshëm se sa zviceranët

BERNË. (15.03.07) Migrantët nga Europa Perëndimore me banim në Zvicër janë po aq të shëndetshëm sa dhe vendësit. Përkundrazi, migrantët nga vende të tjera kanë probleme shëndetësore më të mëdha se sa zviceranët. Këtë e tregojnë rezultatet e një monitorimi federal.

Siç merret vesh nga botimi më i ri i broshurës së BAG-ut "spectra", Enti federal i shëndetësisë (BAG), me qëllim të monitorimit shëndetësor të popullsisë migrante të Zvicrës, realizoi intervista me 3024 veta nga rreth 1,5 milionë migrantë në Zvicër.

Janë anketuar migrantë të moshës nga 15 deri 74 vjeç. Këtu hyjnë në njërën anë qytetarë nga Gjermania, Austria, Franca, nga territoret e ish-Jugosllavisë, Portugalisë, Turqisë dhe Sri Lankës, me banim në zvicër. Janë pyetur gjithashtu dhe azilkërkues nga Sri-Lanka e Kosova.

Gjermanët, austriakët dhe francezët me banim në Zvicër, në shumicën e rasteve dëshmojnë indikatorë të ngjashëm pozitivë si dhe popullsia zvicerane. Për migrantët tjerë, sipas rregullit, këta indikatorë në masë të ndryshueshme janë më të këqinj.

Migrantët që nuk vijnë nga Europa Perëndimore gjendjen e tyre shëndetësore të perceptuar nga ata vetë e gjykojnë më shpesh si mesatare ose më të keqe se sa vendësit. Ata ndjehen edhe psikikisht më pak të baraspeshuar ose kërkojnë ndihmën e mjekut më shpesh se sa zviceranët.

Ekzistojnë ndryshime të dukshme brenda grupimeve të ndryshme të migrantëve nga Italia, nga territoret e ish-Jugosllavisë, Portugalisë, Turqisë, Sri Lankës dhe Kosovës. Varësisht nga origjina, gjinia, mosha ose statusi i qëndrimit në Zvicër, të anketuarit reflektojnë gjendje të ndryshme shëndetësore.

Kështu psh. migrantët italianë, përgjithësisht, ndjehen më mirë, turqit, përkundrazi, jo dhe aq mirë. Femrat në përgjithësi janë më pak të shëndetshme se sa meshkujt, sidomos turket dhe tamilaset.

Pos tjerash, më pak e favorshme është gjendja shëndetësore e azilkërkuesve. Në këtë grupim shëndet më të keq gëzojnë sidomos shqiptarët dhe shqiptaret nga Kosova.

Dallimet shëndetësore midis zviceranëve dhe migrantëve më së qarti i përforcon numri mesatar i vizitave mjekësore. Përveç gjermanëve, austriakëve, francezëve e tamilasve me banim në Zvicër, të gjithë migrantët tjerë shkojnë më shpesh te mjeku se sa zviceranët.

snc shqip:

bislim elshani

zvicra sot >>>

lajme mars 2007 >>>