Shtëpia e religjioneve në Bernë

Në Bernë do të realizohet një "projekt unikal për gjithë botën": Shtëpia e religjioneve, që në Sheshin Evropa, në pjesën perëndimore të qytetit, do të bashkojë gjashtë besime në një vend të vetëm. Vitin e fillimit të ndërtimeve Iniciuesit e llogarisin vitin e ardhshëm.

BERNË. (11.04.07) Siç bënë të njohur iniciuesit këtë të mërkurë, rreth 10 vjet pas shkrepjes së parë të kësaj ideje, e cila do të vihej në dispozicion të mirëkuptimit të popujve, qyteti i Bernës ka ndarë tashmë lejen ndërtimore për kompleksin ndërtimor. Shtëpia e religjioneve do të jetë pjesë e një mbindërtimi me një hotel, me banesa dhe me zyra.

Ky projekt, i cili një kohë të gjatë vlente si utopik, nuk do të realizohej dot pa një formë të tillë të përzier shfrytëzimi. Siç bënë të njohur arkitektët dhe planifikuesit nga zyra e Bauart-it në një konferencë për mediet, etapa e parë ndërtimore do të ketë një preventiv prej 51 milionë frangash.

Në hapësirën përpara kompleksit të ri ndërtimor, të gjashtë religjionet do të kenë qendrat vetjake me sallat e tyre të mbledhjeve. Këto qendra do të plotësohen me një hapësire të përbashkët kontaktesh. Ky projekt, sipas iniciuesve, vlerësohet të jetë "unikal në gjithë botën", dhe "do të rrezatojë shumë larg përtej Bernës."

Do të përfaqësohen besimet e baha'i-t, budizmit, krishterimit, hinduizmit, judaizmit dhe islamizmit. Për sigurimin e financave përgjegjës është një fondacion. Shtëpia e religjioneve mund të llogarisë në ndihmat nga qyteti, kantoni dhe qeveria, mirëpo pjesën më të madhe duhet ta mbulojnë donatorët privatë. Edhe kontratat me religjionet pjesëmarrëse nuk janë përfunduar akoma definitivisht.

Ky projekt do të përfundojë më 2010; Shtëpia e religjioneve përurimin e saj e planifikon nga fundi i 2010-ës.

snc shqip:

bislim elshani

zvicra sot >>>

lajme Prill 2007 >>>