Migracioni mundëson rritjen e shumicës së kantoneve

NEUENBURG. (26.04.07) Deri më 2030 popullsia e shumicës së kantoneve zvicerane akoma do të vazhdojë të rritet - kryesisht për shkak të migrimit. Siç parashikon Enti federal i statistikave, më së shumti do të rritet Freiburgu dhe Zug-u, gjersa Bazeli, Glarusi dhe Uri do të mund të zvogëlohen paksa.

Deri më 2030 kantonet me popullsi më të shumtë do të jenë edhe më tej sipas radhitjes vijuese ZH, BE, VD, AG dhe SG. Ashtu si dhe më parë, ato përmbledhin së bashku më shumë se gjysmën e gjithë popullsisë zvicerane.

Popullsia e VD do të shtohet për rreth 15 për qind, ajo e ZH për 13 për qind dhe ajo e AG për rreth 12 për qind. Kantonet SG dhe BE do të shtohen për vetëm 5, përkatësisht, 4 për qind.

Zh, por edhe ZG, SZ dhe AG do të përfitojnë nga atraktiviteti i aglomeracionit të Cyrihut. FR do të favorizohet, sa nga afërsia me aglomeracionin e Bernës, aq dhe nga largësia jo aq e madhe nga aglomeracioni i Lozanës. Shtimi i popullsisë së VD më në fund pjesërisht mund të shpjegohet me aglomeracionin kufitar të Gjenevës.

Më 2030 vetëm ZH, ZG, FR, VD dhe GE do të shënojnë më shumë raste lindjesh se sa vdekjesh. Mirëpo edhe në këto kantone, ashtu si dhe në kantonet tjera, motori më i rëndësishëm i shtimit të popullsisë është migrimi - si nga kantonet tjera, ashtu dhe nga bota.

Sipas BFS, në Zvicër, numri i personave mbi 65 vjeç do të shtohet nga 16 për qind, në vitin 2005, në mbi 24 për qind në vitin 2030. Kantoni i Appenzellit, me 29 për qind, më 2030 do të ketë pjesëmarrjen më të madhe të banorëve në moshën pensionale, gjersa Gjeneva pjesëmarrjen më të vogël, me gjithsej 20 për qind.

snc shqip:

bislim elshani

zvicra sot >>>

lajme Prill 2007 >>>