Mungesë dhuruesish të organeve

BERNË. (01.02.07) Në Zvicër janë gjithnjë e më pak njerëz të gatshëm për të dhuruar organet e tyre. Listat e pritjes për mushkëri, mëlqi ose veshka po bëhen gjithnjë e më të gjata. Vitin e fundit organet e tyre i dhuruan vetëm 80 veta. Në këtë drejtim Zvicra gjendet në vendin e parafundit në Europë.

1304 njerëz kanë pritur vitin e shkuar për një organ të përshtatshëm - psh. një zemër ose një pankreas. Janë kaq shumë sa kurrë më parë, ngaqë mjekët gjithnjë e më pak mund t'ua marrin organet të sapovdekurve. Siç tregojnë shifrat më të reja të fondacionit Swisstransplant, vitin e shkuar ishin vetëm 80 raste të tilla. 38 njerëz nga lista e pritjes kanë vdekur, ngaqë nuk u gjend dot me kohë për ta organi përkatës.

Krahasimet europiane tregojnë se Zvicra, për sa i përket numrit të dhuruesve për banorë, gjendet në vendin e dytë nga fundi në listën e rangimit. Kjo sepse viteve të fundit Zvicra e ka shpërfillur informimin e popullsisë: gjersa vendet tjera realizuan fushata të gjera informative, në Zvicër kjo gjë iu la në dorë fondacionit privat Swisstransplant, - i cili për këtë qëllim mundi të angazhojë vetëm 120 mijë franga.

Një përmirësim mund të sjellë ligji i ri mbi transplantimet që do të hyjë në fuqi gjatë korrikut. Mbështetur në të, Enti federal i shëndetësisë do të nisë një fushatë të gjerë informative: do t'u dërgojë të gjitha amvisnive karta-dhurimi si dhe do të bëjë një fushatë pllakatesh. Në Swisstransplant, ndërkaq, nuk janë të kënaqur. "Enti federal po e interpreton tekstin ligjor në një formë tejet restriktive", kritikon kryetarja e fondacionit dhe deputetja e Dhomës së kantoneve nga Cyrihu, Trix Heberlein. Enti federal i shëndetësisë e hedh poshtë këtë akuzë, duke argumentuar se parlamenti e kishte refuzuar propagandimin aktiv të dhurimit të organeve.

snc shqip:

bislim elshani

zvicra sot >>>

lajme shkurt 2007 >>>