6400 km pa benzinë

BERNË. (05.02.07) Katamarani zviceran "sun21" është anija e parë lundruese e vënë në lëvizje me energji solare që ka kapërcyer Atlantikun. Të premtën në ora 15, sipas kohës lokale, anija arriti limanin Le Marin në ishullin Martinik të Karaibeve.

Kapërcimi i parë i Atlantikut prej një anijeje solare përbën një akt historik, shkruajnë inicuesit e projektit në një njoftim për mediat. Në këtë mënyrë doli në shesh një dëshmi mbresëlënëse për aftësinë vepruese të teknologjisë solare edhe nëpër oqeane.

Ekuipazhi i anijes "sun21" 14 metra e gjatë dhe 6 metra e gjerë, përbëhet prej dy kapitenëve nga Zvicra Perëndimore, një mjeku dhe aktivisti mjedisor nga Bazeli, një historiani si dhe një biologu të ujërave detare nga Universiteti i Bazelit.

Anija e pajisur me qeli solare, bateri dhe elektromotorë është ndërtuar në Iverdon nga firma zviceranoperëndimore MW-Line. Anije me konstruksion të njëjtë kanë qarkulluar tashmë nëpër liqene të Juras gjatë kohës së Expo.02.

Në fillim të janarit ekuipazhi kishte vendosur që në gjysmën e rrugës midis ujdhesave kanare dhe Cap Verde të lundrojë nëpër Atlantik në drejtim të Martinikut. Fillimisht ishte parashikuar një ndalesë e shkurtër në Cap Verde.

Gjatë ditëve të Kërshëndellave ekuipazhi kishte ndaluar për një javë në Lanzarot për shkak të riparimit. Më pas motori solar punoi ashtu si më parë, pa ndonjë të metë, për ç'shkak ekuipazhi kishte vendosur që të lundrojë direkt nëpër Atlantik.

Nga mesi i tetorit 2006 "Sun21" ishte pagëzuar në Bazel prej presidentes federale Micheline Calmy-Rey.

"Sun21" startoi nga Bazeli për të lundruar mbi Rin në drejtim te Roterdamit dhe prej andej u dërgua në Spanjë. Nga Chipiona spanjolle, me 3 dhjetor kjo anije solare vazhdoi rrugën drejt Lanzarotit.

Në rrugë e sipër për atje "sun21" ndeshi në një stuhi duke i përballuar erërat deri në 7 Beaufort dhe valët pesë metra të larta. Për shkaqe sigurie kjo anije bëri një ndalesë të shkurtër në Kazablankën marokene për të vazhduar më pas rrugën e saj më tej.

snc shqip:

bislim elshani

zvicra sot >>>

lajme shkurt 2007 >>>