Për zviceranët familja më e rëndësishme se sa politika dhe profesioni

CYRIH. (23.02.07) Për zviceranët familja dhe rrethi i miqëve vazhdojnë të jenë, ashtu si dhe më parë, gjëja më e rëndësishme. Vendin e dytë e zë shëndeti. Për të parën herë popullsia zvicerane i jep vlerë më të lartë kohës së lirë se sa aktivitetit profesional.

Në këtë përfundim ka ardhur një studim i Univox-it lidhur me kategorizimin sipas rëndësisë të sektorëve jetësorë, publikuar të enjten nga Gfs-Zürich. Ashtu si me 2002, 88 për qind e familjeve të anketuara përmendin familjen dhe rrethin e miqëve si sektorin më të rëndësishëm jetësor. Si duket, kuptimi i tyre, me gjithë tendencën e individualizimit në rritje, nuk është zvogëluar.

Si i vetmi sektor që ka fituar përgjithësisht ndjeshëm në peshë kundrejt vitit 2002 është sporti. Sektorët si puna, arsimi, kultura, religjioni/kisha dhe politika, përkundrazi, në këtë hark kohor kanë humbur pjesërisht nga rëndësia.

Koha e lirë për të parën herë më e rëndësishme se sa puna

Koha e lirë për të parën herë klasifikohet më lart se sa puna. Hulumtuesit këtë e shpjegojnë me rritjen ekonomike të tre viteve të fundit si dhe me shtendosjen në tregun e punës. Përgjigjet mund të krahasohen me ato nga viti 1993.

Nuk ka ndryshuar aspak kuptimësia e shëndetit. 81 për qind e përcaktojnë atë si "tejet të rëndësishëm", më 2002, ndërkaq, ishin 78 për qind. Që nga anketimi i fundit, burrat tregohen më të ndërgjegjshëm për shëndetin. Me 83 për qind, vlera e tij për ta madje e tejkalon atë të femrave (80 për qind). Mosha, arsimi ose të ardhurat nuk kanë ndikim, konstaton Instituti.

Të kënaqur me kohën e punës

Kurrë më parë të anketuarit nuk janë treguar kaq të kënaqur me gjatësinë e kohës së punës sa këtë vit, konstatojnë hulumtuesit. Më shumë se gjysma e të anketuarve në këtë pikë s'do të donin ndryshime. Çereku i tyre do të donte më shumë kohë të lirë, ndërsa 11 për qind janë të gatshëm, madje, që të punojnë akoma më gjatë për të fituar më shumë.

Përgjithësisht, që nga viti 1987, raportet lidhur me këtë çështje parimisht nuk kanë ndryshuar. Mirëpo, përgjithësisht, sot rrallë ësht i gatshëm ndokush që për më shumë kohë të lirë të pajtohet me një portofol "më të hollë".

Në pyetjen se në cilin sektor të jetës është e dëshirueshme një kohë më e gjatë, përgjigja ishte e qartë: 64 për qind e të anketuarve do të kishin qejf të bënin më shumë udhëtime apo ekskursione. Është rritur më në fund për çudi edhe nevoja për më shumë kohë për sport dhe për pazar.

Univox përbën një vëzhgim afatgjatë të shoqërisë zvicerane. Që nga viti 1986 deri më 1999 ai është realizuar për çdo vit, ndërsa pas vitit 2000 në distanca dyvjeçare. Për këtë qëllim Gfs-Zürich bashkëpunon me rreth 20 institute, kryesisht universitare.

snc shqip:

bislim elshani

zvicra sot >>>

lajme shkurt 2007 >>>