Për nxitjen e integrimit duhen më shumë mjete

Komisioni federal për të huaj (EKA) edhe pas shkrirjes me Komisionin federal për refugjatë do të merret me çështje të rëndësishme rreth integrimit të migrantëve. Që të mund të vazhdohet edhe më tej nxitja konkrete e integrimit nga ana e qeverisë, gjithsesi duhen më shumë mjete.

BERNË. (27.02.2007) Kohëve të fundit në media dhe në politikë është shumë e pranishme tema e integracionit të migrantëve. Një njërën anë kjo gjë të gëzon, sqaroi Francis Mathey, kryetar i Komisionit federal për të huaj (EKA) në Konferencën vjetore për media të këtij komisioni në Bernë. Po qe se nxitja e integracionit do të merrej vërtetë më seriozisht, do të hapeshin perspektiva të reja për migrantët si dhe për gjithë komunitetin. Në anën tjetër, duhet pasur kujdes që integracioni nuk duhet shikuar si një bar çudibërës për të gjitha problemet e mundshme të shoqërisë. Pos kësaj, nxitja e integracionit nuk duhet reduktuar në përvetësimin e një gjuhe vendore. Duhet synuar arritja e barazisë së shanseve dhe ajo juridike në të gjithë lëmenjtë socialë.

Që prej vitit 2001 EKA kujdeset për programin federal të nxitjes së integrimit. Në fund të 2007-tës do të përfundojë programi i dytë i pikave të nxehta. Walter Schmid, nënpresident i EKA-s, paraqiti zhvillimin e programit duke konstatuar me këtë rast se për shtatë vjet ia kishin arritur që nxitjen e integrimit ta ngulisnin në politikën zvicerane për të huajt si një temë të rëndësishme. Nxitja e integrimit kuptohet sot si një detyrë e përbashkët e instancave publike dhe private, si një detyrë që bashkon qeverinë, kantonet, qytetet dhe bashkitë. Përvoja 7-vjeçare me nxitjen konkrete të integracionit ka treguar gjithashtu, sipas Schmidt-it, se pjesëmarrja e të huajve në të është me rëndësi qendrore, ajo, ndërkaq, nuk mund të urdhërojë integracionin, por vetëm ta nxisë atë.

Më 2006 numri i projekt-kërkesave të paraqitura për të parën herë kapi shifrën prej mbi 800 sosh. 615 syresh morën përkrahje, shumë prej të cilave gjithsesi në formën e ndonjë kontributi të reduktuar. 14 milionë frangat, të cilat janë në dispozicion edhe për 2007-ën, nuk do të mjaftojnë për të mbështetur të gjitha projektet që plotësojnë kushtet e kërkuara. Për këtë shkak EKA kërkon një rritje të kredisë së integrimit (kjo për çdo vit dekretohet nga parlamenti në muajin dhjetor në kuadrin e buxhetit).

Simone Prodolliet, kryesuese e Sekretariatit të EKA-s, prezantoi pikat kryesore të aktiviteteve për 2007. Këtu bën pjesë dhe shpallja e çmimit zviceran të integrimit për vitin 2007. Për të dytën herë do të shpërblehen (dekorohen) kontributet e jashtëzakonshme të organizatave, shoqatave, bashkive, firmave apo personave të veçantë. Konkurrimet përkatëse mund të paraqiten tek EKA deri në fund të qershorit. Pos kësaj, komisioni do të merret edhe me rolin e mediave në integrim. Komisioni do t'i publikojë rekomandimet e tij në këtë fushë vjeshtën që vjen. Kësaj teme do t'i dedikohet një numër i revistës "terra cognita" si dhe seminari vjetor i muajit nëntor.

Më 2008 Komisioni federal pë të huaj do të njësohet me Komisionin federal për refugjatë. Në të njëjtën kohë Entit federal për migracion do t'i dorëzohet një pjesë e detyrave operacionale (një pjesë e përpunimit të projektit). Me një fjalë, komisioni do t'i vazhdojë detyrat e deritanishme edhe më tej.

snc shqip:

bislim elshani

zvicra sot >>>

lajme shkurt 2007 >>>